#لا_لتطبيع_العنف_الرقمي | مش كل حاجة أونلاين عادية.. اعرفي العلامات الحمراء
أنا بكتب البوست ده من وجهة نظري كواحدة بنت بدأت تاخد بالها إن في حاجات كنت فاكرة إنها “عادية” على الإنترنت… لكنها في الحقيقة كانت علامات حمراء لأشكال من العنف الرقمي
العنف الرقمي مش بس شتيمة أو تهديد مباشر… أحيانًا بيظهر في صورة سيطرة، ضغط، انتهاك للخصوصية، أو تصرفات بتخلّي الشخص يحس إنه مش آمن حتى وهو خلف الشاشة.
• حد بيطلب مني أرد فورًا أو يضغط عليا أبرر كل حاجة بعملها
• متابعة مستمرة أو أسئلة زيادة عن حياتي من غير ما أكون مرتاحة
• مشاركة صور أو كلام خاص عني من غير إذني
• هزار بيتكرر وبيحرجني أنا بس قدام الناس
• محاولة الوصول لكلمات السر أو حساباتي بحجة “الثقة”
• إحساس دايم إن في حد بيراقب تصرفاتي أونلاين
مع الوقت فهمت إن دي مش تفاصيل صغيرة… دي سلوكيات بتتخطى الحدود، ولما تحصل بشكل مستمر ممكن تتحول لعنف رقمي لأنها بتأثر على إحساسي بالخصوصية والأمان والسيطرة على حياتي.
